Gaualofa

Fesoasoani le Vaafaila o le Gaualofa, a le Aiga Folau o Samoa, I galuega a le SPREP.

O le mataituina o faafitauli o loo afaina ai ‘amu ma aau I le atu Fagaloa.
O se galuega faaauau lea o loo feagai ai nei ma le faalapotoptoga e gafa ma le vaaia o le Siosiomaga o le Pasefika, le SPREP I Vailima.
Pei ona faatautauia ai se isi siaki I le faaiuga o le vaiaso ua tuana’I, lea ua faaaoga ai nei le vaafaila o le Gaualofa, a le faalapotopotoga o le Aiga Folau o Samoa.
E tausaga atoa lava lea ua galulue faatasi ai le SPREP ma le Matagaluega o Faiga Faiva, ma le Malo o Samoa e mata’itu le faafitauli o feagai ai nei ma le gataifale o le afioaga o Fagaloa.
O le poloketi lenei, o loo tilotilo ai I aafiaga o le gataifale mai le vai I Afulilo lea o loo faaola ai le afi vai mo le eletise.
O le vai lea o lo o masaa atu I le aloalo poo le gataifale o FAgaloa, ma o loo faatupeina e le faletupe o Asia lenei poloketi.
Na afua ona faia suesuega tulituliloa nei a le SPREP I ‘amu ma a’au o lenei gataifale, ina ua faasea le tele o aiga I lea vai aai I aafiaga o le gataifale ua leai ni figota ma taumafa sa masani ona latou maua ona o le afi eletise o faaoga ai le vai o loo I totonu o le nuu. O le masina o Me 2009, sa amata ai su’esu’ega a le SPREP.
Na taua e le sui o le SPREP , Caroline Vieux, lea e gafa ma le pulega o amu ma aau, sa latou suesue’a uma lava amu o lo o ola ai I le aloalo lenei e oo lava I le ituaiga o I’a o ola ai, talu mai Iulai 2009. ma sa amata mai ai lava ona alu a latou suesuega ta’i tolu masina e faitau le aofa’I o amu fou o loo tutupu a’e
Na taua foi e Caroline, “o loo manino lava le faafitauli o feagai nei ma Fagaloa, I le pepe o amu ona o mea o loo to’a ane iai, lea ua vaai foi latou iai I taimi e faia ai a latou suesuega.
O le mafuaaga tonu o lenei faafitauli e le’o iloa lava e oo mai I le taimi nei, ona e iai nisi itu faalenatura, pei o afa, o le suiga I le malulu o le suavai, ae o aafiaga foi mai tagata pei o le tafega o le suavai mai Afulilo lea o loo vili ai le afi vai eletise ma faaalu agai I le sami, lea e ao foi ona faia iai se fuafuaga.
O le suesuega lata mai nei lea na faia ai I le vaiaso talu ai, o le masina o Mati 2010 I le faiga paaga ma le Aiga Folau o Samoa, ma le Vaka Gaualofa.
O isi suesuega ua tuana’I sa faaaoga ai se tama’I vaa, sa toso ese taavale I Fagaloa. Ona o le taumamao o FAgaloa, sa masani ai lava ona lua aso e faia ai lenei galuega.
O le fesoasoani a le Vaka Gaualofa pei ona ta’ua e Caroline, ua faigofie ai foi I le au suesue ona faatino lenei galuega I le aso e tasi.
Talu ai, le faigata tele o auala e faataunuu ai ia ituaiga o suesuega, ua maitauina ai, o le faaaogaina o le vaafaila e folau atu I le atu Fagaloa, e le gata ose tasi lea o auala ua molimauina le faigofie ae ua sili atu lea mo le siosiomaga.
Na saunoa foi le pulega o galuega tau I le siosiomaga o amu ma aau, a le SPREP, o se tasi foi lea o auala e faaali atu ai le lagolago a le SPREP I le Aiga Folau o Samoa, ae ose avanoa foi mo le mamalu o le atu Fagaloa e maimoaina ai le Vaka Gaualofa.
E toafitu le auvaa sa fesoaoani tele I le folauga I lea aso mo le ogasami tonu na faatino ai suesuega a le aufaigaluega a le SPREP.
Ua tuufaatasia ai nei se lipoti o ia suesuega uma talu mai le masina o Me 2009, mo le agai I luma o fuafuaga I le faafitauli pei ona molimauina.